HISTORIAFCCP a wordo funda door di Sr. Rudy Rodriguez na maart 2012 pa yuda conscientisa tur hende homber pa bay docter y controla nan PSA. Lamentabelmente Sr. Rudy Rodriguez a fayece na 2014 y prome cu el a bay laga nos, el a puntra pa duna e siguiente mensahe:
Ami tawata laat, wak pa abo no ta laat. Nos tur di Fundacion Contra Cancer di Prostaat ta boluntario y mayoria ta pashent cu a bataya of ainda ta bou di tratamento pa cancer di prostaat. Nos t’ey pa un y tur cu kier mas informacion of cu djis kier papia tocante cancer di prostaat. |
BO TAWATA SA CU1. Tur aña ta detecta mas y mas caso di cancer di prostaat na Aruba.
2. Despues di cancer di cuero, cancer di prostaat, ta e cancer cu ta prevalece bou di hende homber. 3. Na edad avansa un gran mayoria di hende homber tin cel di cancer den nan prostaat, pero no ta tur di e celnan aki ta agresivo. 4. Cancer di prostaat ta tratabel basta e wordo diagnostica i trata na tempo. 5. Un simpel test di sanger via bo doctor di cas den cua ta midi e PSA por evita sufrimente innecesario |
KICO BO POR HACI1. Bishita bo docter di cas y puntr’e pa haci un test di laboratorio pa controla e nivel di PSA.
Si bo ta: - riba 50 aña di edad. - riba 40 aña di edad y tin of tawatin cancer di prostaat den bo famia. 2. Sigui conseho di bo docter di cas. |
Cancer no ta wega. Bo bida ta hopi importante pa bo y bo famia. E consecuencianan di no haya tratamento na tempo por ta hopi doloroso pa bo y (specialmente) pa bo sernan keri.